قوم عاد بناة الأهرام وخازوق الشرتونى

أيمن غالى

الحوار المتمدن-العدد: 8297 - 2025 / 3 / 30 - 10:47
المحور: كتابات ساخرة
    

عندنا كتاب بعنوان "معجم عطية فى العامى والدخيل", تأليف الشيخ رشيد عطية (متوفى سنة 1956), وده لغوى مسيحى لبنانى ..
عمنا عطية فى جزء من كتابه المعَنوَّن بـ (الدخيل) تحقيق خالد عبد الله الكرمى, دار الكتب العلمية, بيروت ص204؛ عن الكلمات الدخيلة فى العربية وكلمة (Antique أنتيك), وإللى بتتقال عن كل ما هو قديم؛ نقل كلمتين عن واحد إسمه الشيخ سعيد الشرتونى فى تعريبه للكلمة ..
الشيخ سعيد بن عبد الله بن ميخائيل بن إلياس بن الخوري شاهين الرامي، من مواليد بلدة شرتون من أعمال جبل لبنان (1849-1912م)؛ علشان كده أخد لقب الشرتونى ..
عم سعيد؛ حب يعمل خدمة للغة العربية وهو مش دريان إنه حا ييجى من بعده ملاحيس مش حا يقدروا يفهموا كلامه وحا يؤولوه بغباوة عن جهل وإستنطاع ..
عم سعيد؛ مَسَك كلمة (أنتيك), ويجيبها يمين ويجيبها شمال ويقلّبها من فوق لتحت؛ ما عرفلهاش وش من قفا ولا حاجة تقرب لها فى معاجم العرب؛ راح محنكش الحناكيش وقال: نسميها (عاديات) ..
● عاديات مين يا عم الحاج ؟! وإيه علاقة الأنتيك والأنتيكة والأنتيكات بالعاديات ؟!
عم سعيد قال:
○ أنا أقصد إن الحاجات إللى بيقولوا عليها أنتيكة بتاعة ناس مش موجودة؛ يعنى ماتوا من زمان, وإحنا ما نعرفش للعرب حد مات من زمان أقدم من قوم عاد المذكورين فى القرآن ..
● طيب أنت تعرف قوم عاد دول كانوا موجودين فعلاً ؟!
تعرف كانوا عايشين فين ؟!
تعرف كانوا عايشين إمتى ؟!
هو أى مصيبة فى رغيف يا عم سعيد .. أنت عاوز ترازينا وخلاص ؟!
عم سعيد:
○ ما أنا كاتب الكلام ده لشوية عبايط مش فاهمين الألف من كوز الدرة؛ حا أشرح لهم كلمة "أنتيك" إزاى وأقرّبها لأدمغتهم الزفت دى إزاى ؟ وبعدين أنا كاتب فى شرحى عن الاشياء القديمة ومنها البئر القديمة؛ "بئرٍ عاد"؛ مش يئرْ عاد؛ مش عارف الشيخ عطية - وهو بينقل كلامى - ما حطش علامتين النصب ليه تحت كلمة بئر ؟!
● يا عم سعيد أنت مش فاهم الهم والغم إللى حا نتطشوا بيه؛ إحنا حا نشوف المرار يا عم سعيد؛ حا يطلع لنا مهاويس العرب وحا يقولوا لنا إن قوم عاد المذكورين فى القرآن كانوا عايشين فى شبه جزيرة العرب وهما إللى أسسوا الحضارة المصرية وبنوا الأهرام ..
عم سعيد:
○ إحنا نقول عاديات؛ يعنى حاجات قديمة لناس قديمة مش شرط تكون لقومْ عاد ونقول بئر عادية؛ يعنى بير قديم .. الناس حا تفهم يا أيمن يا غالى ما تقلقش, وبعدين أنا كاتب قومٍ عاد مش قَومْ عاد
● يا عم سعيد أنت ما تعرفش الأدمغة النيلة دى ممكن تعمل فينا إيه وتنفخنا إزاى
عم سعيد:
○ إبقى إشرح لهم أنت بقى يا أيمن يا غالى
● منك لله يا عم سعيد

يعنى خلاصة القول؛ إن سعيد الشرتونى طشنا بكلمة (عاديات) لأى شئ قديم ومنها الآثار وبإفتكاسة الشرتونى؛ تقول على أى شعب قديم: (قومٍ عادْ؛ مش قَومْ عادْ)؛ يعنى شعوب قديمة مش ناس إسمهم عاد
وده فِهم الشرتونى لتعبير "قوم عاد" القرآنية بإنها شعوب قديمة (يعنى أى شعوب عايشة فى أى حتة وفى أى أزمان قديمة) مش شعب بعينه زى ما العبايط فاهمين ونافخّيننا معاهم ..
يعنى لمّا يقول إن بناة الأهرام "قَومٍ عاد" يعنى شعوب قديمة مش ناس بعينهم كان إسمهم عاد ولا إنهم شعب كان عايش فى شبه جزيرة العرب وجه مصر وبنوا الأهرامات وراحوا فى داهية .. الموضوع ده كله غباوة بدايتها كانت من عند عم سعيد الشرتونى ..

عرفتم بقى الإسطوانة المشروخة إللى بيرددها العروبيين وسكان جزيرة العرب بإن قوم عاد هم بناة الأهرام؛ جات لنا من أنهى داهية
منك لله يا عم سعيد يا شرتونى

#أيمن_غالى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجر	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امي

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات